雖然湖人尋日喺西岸榜首大戰，主場以131:96大勝小牛，可惜加素又傷出，加埋阿堤斯又未好番，聽日主場對火箭讓7分隨時有暗湧。

高比登得分王第15位

湖人尋日對小牛可以話按住搶，打咗3節已經拋離40分，最終以35分之差大勝，取得今季最大差距勝仗。湖人全場總共有7位球員得分達雙位數，其中後備法馬更取得職業新高24分，至於高比拜仁雖然只得15分，但已經足夠令佢追平紐約人名將伊榮，以24,815分升上NBA史上得分王第15位，《ESPN》估計照高比目前嘅得分走勢，好大機會喺13場後超越喺職業生涯攞到25,192分嘅前湖人名宿謝利韋斯，升上第14位。

不過湖人嚟緊嘅前景就似乎唔多樂觀，事關西班牙球星加素尋日打咗7分鐘就扭傷左腳，嚟緊要照超聲波先知要抖幾耐，加埋早前喺屋企離奇仆落樓梯嘅阿堤斯，話自己聽日倒戈火箭上陣機會只得一半半，湖人讓7分唔算穩陣，吼下盤可能有意外收穫。