一向係「作客蟲」嘅山貓，近期突然獸性大發，尋日作客更以91:88勇挫騎士，終止對手7連勝同主場11連勝兩項紀錄。
占士臨完場3分唔入
季初作客成績一度係1勝14負嘅山貓，近期反而喺人哋主場搵到食，繼上場作客以107:97大勝熱火後，尋日不足24小時作客騎士，又憑史堤芬積遜射入22分贏波，取得今季作客首次2連勝。
其實騎士本來有機會追平，可惜勒邦占士最後一擊3分波彈框唔入。對於騎士今季連續兩次輸畀山貓，全場射入29分嘅占士表示一啲都唔意外：「老實講，山貓真係一支好有潛力嘅球隊，每次交手都畀好多麻煩我哋。」
