本文重點
塞爾特人同金塊尋日朝分途出擊，都要面對主力缺陣嘅大難題，當中「綠軍」正選5缺3，好彩依然憑臨時擔正嘅拉舒華萊士發揮高水準，以103:96力克速龍。至於金塊冇咗兩大台柱安東尼同比立斯要由新星羅臣領軍，亦都作客以105:95殺敗爵士，同樣搶鏡。
塞爾特人三巨頭之中，中鋒加納特已經係連續第2場缺陣，得分重心皮雅斯更已連抖5場，只留低雷阿倫獨擔大旗，加上新星朗度亦受鼠蹊傷患困擾未能披甲，搞到今季多以第6人身份出戰嘅拉舒華萊士，都要正選亮相。好彩「綠軍」最後憑改打控衞嘅雷阿倫獨取23分，「麻煩友」拉舒華萊士穩守內線之餘兼得16分，成為贏波功臣。
羅臣9助攻職業生涯新高
塞爾特人正選中鋒柏堅斯賽後大讚拉舒華萊士：「佢絕對係聯盟內首屈一指嘅低位球員。」至於主帥李華士則大讚球員嘅比賽態度，係喺絕境反勝終止3連敗嘅關鍵。
另邊廂，缺少安東尼同比立斯兩大台柱，金塊仍憑住出色防守砌低爵士。代替比立斯擔正打控衞嘅一年級生羅臣，全場交出23分同職業生涯新高嘅9個助攻，成為頭號功臣。雖然比立斯近6戰缺陣5場，但家陣羅臣咁弗，嚟緊金塊食粥食飯都要睇佢咯。
