一年一度嘅NBA傳統聖誕夜大戰（香港時間boxing day），今年由騎士出訪湖人擔綱。大戰當前，騎士嘅「大帝」勒邦占士已經及時谷起最佳狀態，喺尋日朝對帝王之戰交出「三雙」兼夾完美防守，帶領騎士喺加時後以117:104取勝。占士狀態一流，同高比拜仁交手肯定緊湊，比分會拉得緊，騎士今戰受讓2.5分，捧下盤有着數㗎！

大帝3雙挫帝王

騎士尋日朝面對住年輕班底嘅帝王都算陷於苦戰，打完4節只能同對手打成104平手，要靠加時分勝負，可幸緊張關頭有「大帝」占士打出超卓防守，令到全場交出28分嘅帝王新星泰拉基伊雲斯，喺第4節同加時階段8投只得1中，帝王喺加時更加1分都攞唔到，配上隊友伊高斯卡斯喺加時嘅3個3分波，最終鎖定勝局。

放大圖片

放大圖片

雖然今場攞到「三雙」34分、16個籃板同10個助攻，但占士賽後都提醒隊友必須要加強防守，先可以取得成功：「對方嘅進攻喺頭3節實在做得相當輕鬆，直到第4節我哋先做出好嘅防守。能夠將防守做到密不透風當然值得高興，但關鍵係我哋點樣喺48分鐘都做到最好。」

目前喺東岸排第3嘅騎士，近8戰贏出7場，氣勢如虹挑戰西岸「一哥」湖人，肯定有好戲睇。近5戰全勝嘅湖人，今季表現依然勇銳，近日更有中鋒加素成功續約3年，士氣正盛，同騎士之爭話唔定又要加時分勝負。