麥基迪尋日終於打出復出後嘅代表作，喺8分鐘盡顯身價，率領一班後備兵發威，帶領火箭主場以108:99鑿沉快艇，場面直頭拍得住《十月圍城》入面，一班市井用生命拯救孫中山咁轟動。

火箭一班正選尋日表現麻麻，只有柏堤亞同史高拉得分達雙位數，好彩後備交足功課，合共射入62分，當中照舊獲得8分鐘上陣機會嘅麥基迪，喺有限時間內，交出10分同3次助攻嘅驚人成績。至於之前被魯域斯基打甩5隻牙，啱啱做完牙科手術，尋日閃電復出嘅蘭特利，更射入平職業新高嘅27分，最終帶領火箭擊敗快艇，取得雙方近11次交手第10場勝利。

比沙比拉重傷或收咧

賽後T-Mac表示，覺得自己表現一場比一場好，逐漸搵番比賽信心同節奏。至於蘭特利則發揮金句王本色：「我哋冇超級球星，不過隊中有一班好肚餓嘅狗，個個都想贏。」

同日拓荒者作客憑萊爾射入23分，加上艾迪列治取得19分，作客以85:81擊敗有魯域斯基復出嘅小牛，可惜中鋒比沙比拉比賽中重傷，好大機會提早收咧，加埋養緊傷嘅奧登、巴頓、費南迪斯、歐羅同米斯，拓荒者條路都咪話唔難行。