本文重點
主場惡晒！唔係講湖人、魔術或塞爾特人，係講緊西岸勁旅太陽呀！連埋尋日朝主場以121:95力克巫師之後，太陽開季至今主場10戰全勝，係NBA唯一保住主場不敗嘅球隊。聽朝佢哋會喺美國航空中心主場迎戰騎士，氣勢咁好，讓6分都照捧上盤！
鬥騎士讓6分照捧
尋日太陽全隊都表現卓越，打咗3節已經帶離巫師33分，首席球星拿殊第4節更留喺後備席睇波算數，總算為之前一仗畀拓荒者反勝一吐烏氣。咪以為呢個加拿大球星打3節數據就冇特別，佢一樣係攞到15分同15個助攻，認真唔簡單。拿殊賽後表示：「我哋從來都唔會連續兩場打得衰，積極自我反省，再全力一拚，係我哋反彈大捷嘅原因。」太陽今仗投射命中率去到52%。
連同上季計算，太陽個主場已經連續19場未輸過，聽朝佢哋喺主場迎戰騎士，雖然個盤要讓6分好似太狠，但考慮到勒邦占士同奧尼爾仲未夾到最好，氣勢好嘅太陽隨時可以再大勝一場。
