蘭特利用牙換取勝利！尋日NBA上演嘅德州打吡火爆到暈，火箭後備蘭特利更被打甩5隻牙，不過作客嘅火箭最後加時以116:108擊敗小牛。由於比賽中T-Foul此起彼伏，小牛班主古賓揚言會向賽會抗議，睇嚟定有手尾跟！

魯域斯基手肘縫3針

小牛同火箭尋日之所以打得咁火爆，相信同上半場一次意外有關。話說第二節開賽冇耐魯域斯基上籃，火箭後備蘭特利為咗博對方進攻犯規，喺籃底企定定硬食魯域斯基一(月爭)，結果搞到兩敗俱傷冇再返入球場，魯域斯基手肘被蘭特利嘅牙齒割傷縫咗3針，蘭特利更加被打甩5隻牙。

之後雙方不時發生衝突，完場前傑特同火箭嘅大衞安達臣發生推撞，差啲釀成群毆，兩隊合共出現6次T-Foul，其中小牛教練卡素爾同中鋒丹比亞都喺加時階段累積2次T-Foul被趕出場，最終火箭憑後備路維大發神威，攻入職業新高26分，協助火箭擊敗小牛，終止對方5連勝走勢。

賽後小牛班主古賓表示會向賽會抗議，理由係球證喺加時階段至少出現3次誤判。講番魯域斯基，佢賽後接受X光檢查，傷勢唔算嚴重，但就好大機會錯過聽日主場對騎士一戰，魯域斯基今季平均每場有26.1分，小牛冇咗佢真係好大鑊，騎士受讓5分梗係要捧下盤！