艾佛遜無負「戰神」威名！呢位明星級後衞尋日大發神威，個人獨取20分，再加上另外6位隊友齊齊射入雙位數字得分，成功助76人喺主場以117:101擊敗勇士，終止12連敗走勢。可惜另一球星伊古達拿勇戰受傷，聽朝對騎士上陣成疑，76人即使受讓10.5分都捧唔過！

膝傷賽前抽55毫升積水

近年艾佛遜頭頭碰着黑，先喺活塞飽受排擠，然後季初轉投灰熊又因為失落正選位置而出走！好在佢回歸母會76人之後，開始搵番昔日「戰神」風采，尋日賽前因為膝積水抽咗55毫升積水出嚟嘅佢，主場出擊10射7中，個人貢獻20分，更帶動楊格及賀列地等6位隊友分別攻入雙位數字得分，最終76人亦以117:101擒下勇士！

其實今次勝利意義重大，首先76人因此終止連續12場輸波戰績，除此之外，亦係艾佛遜個人今季首嘗贏波滋味：「今場波真係好難打，可以話係我咁多場勝仗中最艱巨嘅其中一仗。」

放大圖片

放大圖片

只不過76人亦付出唔少代價，因為另一主將伊古達拿是役肋骨受傷，幾時復出都成疑問，聽朝主場硬撼由勒邦占士領軍嘅騎士都係凶多吉少，就算受讓10.5分都係捧番上盤為妙！