被譽為今季MVP兩大熱門嘅高比拜仁同韋迪，尋日交手認真好睇過戲，最終高比完場前喺韋迪面前射入一記3分波，技術性擊倒對方，帶領湖人戲劇性以108:107反勝熱火，為聽日硬撼太陽打下一支強心針。

尋日場波嘅高潮可以話喺完場前9秒開始，當時熱火憑韋迪射入兩個罰球領先106:102，但湖人憑老將費沙完場前4秒射入3分波只落後1分，之後韋迪兩罰中一，喺完場前3.2秒咧住湖人2分，點知湖人嘅高比拜仁喺完場前一剎那，竟然喺韋迪面前跳投射3分擦板入，助湖人戲劇性反勝熱火1分。

放大圖片

放大圖片

明鬥鳳凰城-7照追上盤

全場射入33分嘅高比拜仁賽後好興奮：「呢球好可能係我NBA生涯最符碌嘅入波。我出手嗰下好順，但我真係冇諗過會入。」有26分進帳嘅韋迪賽後大讚高比：「偉大嘅球員會入一啲令人難以置信嘅波，依家喺NBA入面冇幾多個可以做到，高比肯定係其中之一。」

湖人贏埋呢場後，經已取得8連勝，氣勢如虹，聽朝佢哋會喺主場對太陽合演「西岸榜首大戰」，以高比目前嘅狀態，讓7分上盤亦捧得過，畢竟太陽近排連輸2場，有回塘嘅迹象。