今季NBA得分王大熱門安東尼同韋迪尋日正面交鋒，結果「小甜瓜」安東尼率領金塊主場以114:96撲熄熱火，勢如破竹，相信聽朝對住啱啱對塞爾特人錯漏百出嘅馬刺，受讓2分可開出下盤！（now670台及中央5台周日早上9:30直播）

金塊嘅主場百事中心，一向都唔旺韋迪。好似尋日咁，「閃電俠」受制對方艾夫拉洛同JR史密夫嘅防守，全場只射入25分，令熱火連續6次作客輸畀金塊。金塊亦成為韋迪7年NBA生涯之中，唯一一支作客未贏過嘅球隊。

受讓2分下盤好路

其實金塊尋日贏波，勝在夠全面，全隊有6人得分達雙位數，當中「小甜瓜」安東尼繼續有穩定演出，射入22分，繼續保持係今季NBA唯一一位場場得分都有20分或以上嘅球員，賽後安東尼好興奮：「可以贏到熱火絕對係一件值得高興嘅事。好明顯，我哋今日大家合作得非常好。」

聽朝金塊將會乘勇作客馬刺，馬刺尋日主場對塞爾特人打到失晒魂，全場竟然有18次失誤，3分波16射僅2中，罰球17射僅7中，新秀貝理雅有球搶防守籃板時，仲唔小心「擺烏龍」，簡直係錯漏百出，你話聽日主場對住2連勝嘅金塊，仲邊有本事讓對手2分？再唔係玩大都得，皆因金塊已經連續7場得分達到100分或以上，大盤「餐士」唔錯㗎！