尋日NBA上演「狀元大戰」，奧登同戴歷羅斯兩位前新秀狀元正面交鋒，結果奧登大顯身價，射入平職業新高嘅24分，帶領拓荒者主場以122:98宰割公牛。

入24分平職業新高

雖然奧登比戴歷羅斯早一年（07年）成為NBA新秀狀元，可惜出道後一直受傷患困擾，直至今季先叫做有番啲起色，尋日對公牛更打出今屆代表作，全場8射7中，罰球12射10中，取得平職業新高嘅24分兼12個籃板，並成功箝制目前NBA「籃板王」諾亞，令對方只得7分同8個籃板，令拓荒者取得今季新高122分。

放大圖片

放大圖片

不過，拓荒者教練麥美倫仍然認為，奧登未完全適應球隊進攻打法，仲有進步空間：「奧登好有耐性，喺底位不斷有進步。」

相比起奧登，08年狀元戴歷羅斯尋日就大為失色，全場只為公牛取得14分，佢認為球隊完全輸畀拓荒者嘅「巨人陣」：「當你得6呎6、6呎7吋，要同7呎嘅對手搶籃板真係好難！」