香港運動員出戰東亞運動會有主場之利？邊個話㗎！東亞運還有10天揭幕，惟被視為「金牌希望」的單車隊至昨日為止，竟尚未收到賽道資料，香港「體壇Icon」黃金寶昨罕有地公開批評，怒斥主隊完全浪費主場優勢，他更強調香港申辦2019年亞運實在要審慎部署。
咁樣點辦亞運?
早前勇奪全運金牌的黃金寶昨與總教練沈金康，專程由深圳返港出席體院的青少年運動員頒獎典禮。為準備東亞運，「阿寶」與隊友早已在深圳練習，作為東道主反而要出外集訓，這點已夠諷刺了，誰料連賽道基本資料至今仍欠奉！
無法了解比賽路線固然失望，對訓練亦有影響，「阿寶」氣憤地說：「你哋（指記者）可能仲清楚過我，其實都幾擔心，有主場等於冇，原則上好多比賽前半年已經畀運動員知道，我真係有啲失望，或者東亞運可以咁樣，但如果辦亞運就唔可以。」他透露今屆全運會前半年已得悉賽道資料，98年曼谷亞運，更於一年前「收到料」。
沈金康未定出賽名單
「阿寶」又指，有關方面在決定賽道上從未向運動員諮詢：「去南韓比賽，人哋會安排平路有利佢哋嘅車手，但今次我唔覺得有主場之利，要贏獎牌真係無把握，因為條路係點都未知。」
據大會公布的資料，個人公路賽會在科學園作起點，走過馬鞍山繞道，全程都是高速公路，市民想現場為港隊打氣都幾難。
黃金寶認為若以香港爭牌為目標，應安排港將經常練習的新娘潭路段及大埔舊路，若從宣傳方面考慮也可移師鬧市，甚至尖沙咀彌敦道或沙田：「或者有關當局怕影響交通安排，但難得在自己地方搞比賽，我會覺得幾可惜。」
由於未能確定賽道的資料，總教練沈金康坦言目前還未能決定出戰運動員名單。「阿寶」昨晚即返回深圳南澳繼續備戰，至下月8日才隨大軍返港出戰東亞運動會。