乜嘢叫「輸到人都癲」？問吓NBA現時唯一之「長敗之師」籃網就一清二楚！籃網尋日雖然有明星控衞夏里斯復出，不過主場對住另一支魚腩、東岸排尾二嘅紐約人一樣冇符，輸91:98，開季至今13連敗，難怪陣中新星羅拔斯都話：「我嘅精神受到好大折磨！」

差4場平紀錄

籃網開季戰績極差，同夏里士、易建聯等正選長抖有關，本來尋日籃網迎嚟開齋最好機會，主場對手係同屬「魚腩級」嘅紐約人，加上夏里士久休復出，點知球隊表現依然差勁，夏里士有12分同7個助攻算係交到貨，但對手5個正選全部得分雙位數，輸埋今場籃網戰績已變成0勝13負。

NBA史上開季最長連敗係熱火同快艇共同保持嘅17連敗，13連敗嘅籃網未來4場波全部作客，分別對住金塊、拓荒者、帝王同湖人，要「追上」紀錄簡直係「指日可待」！籃網長輸長有，今季表現出色嘅新人羅拔斯亦大嗌頂唔順：「每一場波都輸真係好難受，有時我輸到唔知自己喺邊，精神上真係好大折磨！」