21/11/2009

播放本新聞相關短片

爵士破宿命作客拔剌

人生有幾多個10年?偏偏爵士竟然近10年都未試過喺聖安東尼奧贏波,好彩佢哋喺尋日終於打破呢個魔咒,憑布沙重現卡爾馬龍昔日嘅霸氣,作客以90:83拔走馬刺,打破宿命。

唔講唔知,原來爵士對上一次喺常規賽作客贏馬刺,已經係99年2月28號嘅事,當年爵士贏波,全靠攻入30分嘅卡爾馬龍。10年過後,爵士憑馬龍接班人布沙獨取18分同11個籃板,當中喺關鍵嘅第4節更狂入10分,加上「新史托頓」迪倫威廉士亦取得「雙雙」,錄得21分同10次助攻,終令爵士打破喺聖安東尼奧連輸20場嘅魔咒。

攻擊點多讓得起活塞

賽後布沙非常興奮:「我哋一直想打破呢個宿命,試過只差少少,終於喺今日實現。呢場勝仗正好顯示我哋進步中。」連埋呢場敗仗,馬刺今季戰績改寫為4勝6負,射入21分嘅鄧肯賽後坦言,從未見過球隊開季成績會咁曳,但仍對馬刺前景好樂觀。

其實除咗布沙同迪倫威廉士外,基利蘭高、朗尼比華同米沙比尋日都有雙位數字得分,可見爵士得分非常平均,聽日返主場對住繼續缺少咸美頓同普林斯兩大主力嘅活塞,讓8.5分當然要捧上盤啦!

勒邦芝士