太陽成功反彈！啱啱慘敗畀湖人嘅太陽，尋日喺「壽星仔」史杜迪米亞發威獨取30分，兼有拿殊轟入23分下，主場以101:100曬死速龍，繼續喺西岸領導群雄。

今季狀態大勇嘅鳳凰城，日前作客湖人竟然慘敗，好彩尋日返番主場對速龍成功反彈，當中史杜迪米亞提前一日慶祝自己27歲生日，個人獨取30分同8個籃板，呢次亦係佢自2月18日受傷後，首次攞到30分或以上，再加上拿殊取得23分同9次助攻，包括完場前38秒博到速龍加特朗犯規，連罰球射入3分，最後帶領太陽成功反勝，保持今季場場得分過100兼跨季主場13連勝，暫時以9勝2負做西岸一哥。

賽後史杜迪米亞表示：「如果我場場都可以打得咁好，全隊又打得咁出色，感覺真係好正，我哋真係好想贏呢場賽事保持主場優勢。」教練根特利則風趣表示：「擊敗速龍呢支咁有質素嘅球隊，絕對係一場重大嘅勝利。佢哋畀到我哋好多麻煩，喺第1節後，我仲以為我哋要射入120分先夠贏波。」

得分場場過百

其實速龍尋日表現真係唔曳，特別係保殊，取得25分同10個籃板，暫時以8次「雙雙」領先聯盟。聽日太陽將會作客火箭，以佢哋得分場場過百嘅表現，相信要贏多場唔難，作客小讓1.5分上盤值得一試。