占士韋迪攜手打江山？近期NBA廣泛流傳呢對好兄弟下季會効力同一隊波，尋日兩人交手前，韋迪就首次開腔，承認兩人的確就有關問題進行討論，睇嚟兩人下季好大機會組成當今最強拍檔。

勒邦占士同韋迪，可謂目前聯盟最TOP嘅兩位球星，大家私底下亦係好友，尋日兩人進行今季首度交鋒，吸引「波神」米高佐敦同昔日好拍檔柏賓入場。兩人賽前先禮後兵，互相擁抱對方，但一落到場就冇面畀，其中韋迪喺開波冇耐，更由後場帶到前場，最後喺6呎11嘅騎士大前鋒華拿祖面前「In your face」大力入樽，賽後占士大讚呢球可能係NBA史上十大入波之一。

佐敦23號波衫退役占士換6號

最終韋迪全場射入36分，可惜最後仍然未能帶領熱火贏波，主場以104:111不敵有勒邦占士射入34分嘅騎士。

其實美國傳媒近日已經廣泛流傳兩人下季將會合作嘅消息，事關雙方來年都可以選擇恢復自由身。不過占士近排明顯被人問到躁，早前再被問呢個問題時，突然終止訪問，表明最後一次回應，一切直至季尾先決定，並輕輕帶過細個嘅時候有諗過同佐敦合作。不過好友韋迪就爆料，指佢同占士原來曾經傾過有關下季効力同一隊嘅問題，但就冇講究竟係喺熱火定騎士。不過點都好，韋迪呢番話已經證明兩人的確有合作嘅意思，睇嚟NBA聯盟史上最強嘅拍檔，下季好大機會喺大家眼前出現！

另外，NBA為對佐敦多年來作出的貢獻表示尊敬，下季開始聯盟所有球隊嘅23號波衫會齊齊退役，依家着緊騎士23號波衫嘅占士表示下季或會改着6號波衫。