13/11/2009

播放本新聞相關短片

湖人咬唔入金塊

本文重點

聽朝NBA湖人作客金塊爆發得分王大戰,湖人嘅高比拜仁同金塊嘅安東尼兩大得分高手,將會正面交鋒。可惜高比仔拍檔加素啱啱證實傷勢惡化肯定缺陣,要獨力搶分,相反金塊嘅安東尼就有好幫手JR史密夫復出分擔,金塊主場受讓1分,下盤絕對博得過!

呢場大戰其實亦即係上屆季後賽西岸決賽嘅翻版戰,當時湖人以總局數4:2淘汰金塊。今季兩隊仍然保持強勢,目前分列西岸第2同第3位,每場平均得分都過百,高比同安東尼目前都係得分王頭三甲(見附表),今日交手肯定鬥攞分。

金塊後勁凌厲

不過湖人賽前收到壞消息,原定日內復出嘅主將加素,近日腳腱傷勢出現惡化,教練積遜預言呢名西班牙中鋒最快要到聖誕節先可以復出,再加上拜林仍未傷愈,後備中鋒邁賓加繼續帶傷上陣,換言之得分重任將會繼續落晒喺高比拜仁一人身上,對住二打六就話綽綽有餘,但對住金塊呢啲同級對手,就真係好難打。

金塊尋日作客以102:108不敵公鹿,好彩射手安東尼繼續發揮水準,獨取32分同10個籃板,難得停賽後復出打第2場波嘅JR史密夫亦開始入局射入18分,今場絕對可以協助安東尼分擔得分重任,圍射湖人。最後值得一提嘅係,金塊對上5場比賽有3場第4節得分係球隊全場最高分一節,相反湖人對上5場嘅第4節,有4場得分喺22分或以下,金塊隨時喺第4節先反勝湖人都唔奇。

勒邦芝士