劉翔不愛山珍海味獨愛香港地道雲吞麵！「劉天王」闊別多年後，下月再臨香江參加東亞運動會，爭取三連冠之餘還要「大歎」久違了的一碗鮮味雲吞麵，作為「翔哥」老友的香港「欄王」鄧漢昇笑言，已經做定資料搜集，甘願做「外賣仔」為劉翔送上一碗至美味的「雲吞麵」！

鄧漢昇4年前在澳門東亞運不敵劉翔，但原來二人相識多年、老友鬼鬼，「阿昇」回想起04年被對方急Call「送外賣」都感非常搞笑：「嗰陣時佢嚟香港參加奧運金牌運動員大匯演，畀幾十個記者圍困喺酒店，想出去食啲嘢都唔得，於是佢就Call我『送外賣』畀佢，仲指定話想食香港最地道嘅雲吞麵添！」事實上，劉翔貴為超級巨星生活卻十分平民化，衣着與飲食都較為普通，今次來港亦會隨田徑隊入住大會指定的荃灣悅來酒店，並未要求「特別」款待。

今亮相廣州亞洲賽

「阿昇」知道劉翔很「惦念」香港的雲吞麵，故早已為老友做定Research：「雲吞麵煮好之後就要盡快食，所以要搵一間喺酒店附近嘅麵舖。以我所知，劉翔所入住嘅荃灣悅來酒店附近路德圍有幾間唔錯嘅舖頭，應該可以買畀佢一試。」

「劉天王」現正在廣州準備出戰亞洲田徑錦標賽，這是他復出後的第三場比賽，也是披甲東亞運前的最後熱身，教練孫海平表示愛徒要在亞洲賽奪冠沒有難度，預計決賽約跑出13秒40，跟全運差不多。劉翔今早先參加男子110米欄預賽，決賽明晚上演，「劉天王」今次最大任務是贏取冠軍以奪明年世界盃入場券。孫指導稱：「咁樣會有多半日嘅休息，避免佢腳部受到太大刺激，更有利比賽嘅發揮同確保安全。」亞洲賽昨日進行男、女子百米飛人預賽，香港的黎振浩及梁巧詩均順利跑入複賽。