奧尼爾請纓單挑侯活

本來拿殊喺今年暑假可以恢復自由身，但最後呢名明星隊後衞選擇同太陽續約，好多人都話佢傻，點解仲効力一支冇力爭標嘅球隊，但事實證明，拿殊冇揀錯，佢今季可以話打番出以前後生時嘅水準，尋日更驚人地取得21分同20次助攻，錄得06年1月後首個「雙20」，加上全隊仲有5名球員得分達雙位數下，最終助太陽反勝76人，同時繼90-91年球季、踏入21世紀後，首次開季連續8場射入100分或以上，如果keep住落去，拿殊同太陽今季都幾有機會重奪MVP同西岸冠軍。

太陽今季喺西岸彈起，不過魔術同騎士兩支東岸爭標大熱，暫時竟然三甲不入，但佢哋兩隊聽日交手，仍然係NBA嘅矚目大戰。騎士上季喺季後賽東岸決賽輸畀魔術，全因內線唔夠杜域侯活玩，結果佢哋今季簽入奧尼爾抗衡，賽前「巨無霸」就請纓由佢one on one侯活，信心可謂爆晒燈，預計魔術喺卡特因傷上陣成疑，加上劉易斯繼續停賽下，騎士受讓6分有力開出下盤。