定居喺洛杉磯嘅俄羅斯網球天后舒拉寶娃，去年養傷期間經常着住件「I LOVE LA」（我愛洛杉磯）嘅T恤去湖人主場睇NBA，不過當時冇人估到佢嘅打氣「心意」，直到今個月初，有人見到舒娃同湖人大後備胡查錫齊齊睇U2樂隊演唱會，而且態度親暱，令呢段意想不到嘅戀情愈傳愈真。

NBA奀星多配靚女

湖人上仗對黃蜂，舒娃都有到場支持，胡查錫亦不避嫌大讚舒娃靚女，美國媒體尋日再攞出確鑿證據─舒娃同胡查錫十指緊扣照片！雖然胡查錫依家年薪得500萬美金，同舒娃之前緋聞男友勒邦占士近1,600萬美金年薪爭幾倍，不過相片中2人戴住黑超拖手漫步，臉上流露甜蜜笑容，愛情世界似乎唔會再分身份同地位。

斯洛文尼亞籍嘅胡查錫喺星光熠熠嘅湖人只係大後備一名，今季平均上陣時間得7分幾鐘，勢估唔到可以得到「女神」垂青。事實上NBA都有唔少「奀星」配美女組合，灰熊後衞查歷嘅老婆就係世界知名嘅巴西超模利馬、公牛中鋒諾亞上年亦曾與法國網球美女歌露雲拍拖，胡查錫隊友奧當更喺2個月前同美國真人騷名媛Khloe結婚，籃球健將果然特別受靚女歡迎！

舒娃情史一籮籮

跟魯迪克燭光晚餐

‧在佛羅里達長大的舒娃，曾被拍到與美國小天王魯迪克撐枱腳，不過緋聞隨着魯迪克與名模戀上，「克娃戀」亦告一段落。

同祖高域面貼面唱Ｋ

‧塞爾維亞「扮嘢王」祖高域幽默又細心，07年約會佳人唱Ｋ大唱冧歌，兩人面貼面合唱，恰如一對熱戀情侶，「扮嘢祖」亦公然在比賽中「扮舒娃」，逗紅顏一笑。

畀樂隊主音「完唱」

‧人氣樂隊Maroon5主音Adam Levine在舒娃的18歲生日會上獻唱，二人火速撻着，但激情過後，男方極無品周圍唱舊愛床上技巧，令「娃姐」非常尷尬，再見不是朋友。

冧年輕才俊艾博素

‧舒娃去年底深受肩傷困擾期間遇上美國小富商、溫文有禮的艾博素，伊人還在一項慈善活動中以「男友」來形容對方，公開親密關係。

胡查錫係乜水？

出生日期：1984年3月8日（25歲）

國籍：斯洛文尼亞

身高：2米01

年薪：500萬美元

球隊 / 位置：洛杉磯湖人 / 得分後衞

榮譽：1屆NBA總冠軍（09年）