衞冕NBA總冠軍嘅湖人，尋日用咗半場時間就閃電KO黃蜂。如果上半場嘅焦點係「小飛俠」高比拜仁，咁下半場就一定係胡查錫，皆因呢名斯洛文尼亞球星獲緋聞女友舒拉寶娃入場打氣大打身價波，愛情嘅威力真係得人驚！

湖人今季飽受傷兵問題困擾，加素同拜林兩大球星仍未傷愈，尋日對住黃蜂，教練積遜賽前預計會係一場硬仗，點知打落先知對手係不堪一擊，高比對住黃蜂嘅迪雲布朗呢個match up，簡直係冇得打，單係上半場就攞咗26分，帶領湖人半場輕鬆領先13分，下半場高比明顯放軟手腳，只得2分。

尷尬受訪避談關係

之後湖人愈打愈順，喺第3節更一度領先27分，除咗多得中鋒邁賓加同後備沙朗布朗外，一定要提一提胡查錫，事關呢位斯洛文尼亞球星，早前被狗仔隊影到同網球女星舒拉寶娃去睇U2演唱會，尋日呢位緋聞女友更加入場打氣，結果胡查錫望見「女神」真係特別醒神，出場12分鐘攞到7分，3分波兩射全中，其中包括喺完場前49秒連3分加罰球射入一個「4分波」。

賽後當地傳媒問胡查錫同舒拉寶娃係咩關係時，胡查錫相當尷尬，仲將個咪塞畀隊友奧當：「你哋應該去問奧當嘅私生活，我肯定佢會講畀你哋知！」其實胡查錫都係想保護女友，大家放過佢啦！