整體戰個個落場都有分

拓荒者開季表現麻麻，頭5場輸足3仗，教練麥美倫為咗止血，上仗對馬刺試驗用萊爾、布力克同安祖米拿3名後衞一齊擔正，結果成功贏波，尋日主場對木狼，拓荒者照辦煮碗又收到奇效。事實上用新陣嘅拓荒者，有出過場嘅球員都攞到分，今季由76人加盟嘅安祖米拿更取得今季個人新高21分，中鋒艾迪列治更有19分同10個籃板嘅「雙雙」成績，但主將萊爾就只得2分，不過呢名拓荒者得分王賽後卻表示依家整體打得好好，唔需要靠佢得分唔係壞事。

難得萊爾都話唔介意，證明拓荒者一班球員好齊心，相反灰熊就唔多掂，老將艾佛遜又暫時離隊，唔影響軍心就假，聽日喺主場對住冒起嘅拓荒者，睇怕都冇好下場！