打籃球除咗進攻之外，其實防守亦好重要！好似尋日公牛作客騎士，就憑銅牆鐵壁阻止勒邦占士絕殺，成功險勝86:85，聽日返番主場對山貓小讓2.5分，上盤絕對可以睇高一線。

一向喺主場惡晒嘅騎士，尋日喺自己地頭對住公牛，去到完場前仲落後1分。喺呢個緊張關頭，騎士派出「大帝」占士處理最後一擊，可惜佢喺完場前一刻嘅上籃，被公牛嘅鄧格同諾亞double team瓦解，累騎士輸波終止3連勝，同時錄得今季第二場主場敗仗，平咗上季嘅紀錄。

成功封阻占士絕殺

賽後雙方各執一詞，公牛諾亞堅稱：「我完全冇擔心過會被吹罰，因為我根本冇掂過佢。」不過占士就話：「我感覺到被鄧格推咗一下，同時喺跳起嘅時候受到諾亞干擾。呢啲都唔足夠我射罰球？」

公牛贏波除咗有賴防守之外，勝在得分夠平均，全隊有5位球員得分達雙位數，戴歷羅斯更取得今季首個「雙雙」，攞到14分同11次助攻，相信聽日可以乘勝追擊，帶領公牛主場擊敗山貓！