被譽為當今NBA最具天分嘅控衞朗度同基斯保羅尋日正面交鋒，雖然「CP3」贏個人數據，但朗度最後仍然帶領「綠軍」贏黃蜂97:87締造4連勝，搞到基斯保羅勁唔忿氣，想走去搵朗度撩交打，好彩被人及時制止。

「CP3」尋日作客塞爾特人光芒四射，取得22分同8次助攻，明顯優勝過只得6分同10次助攻嘅朗度，不過塞爾特人最後卻憑皮雅斯、雷阿倫、加納特同拉舒華萊士「四大天王」合力轟入70分勝出，近3季第2次做出開季4連勝，就搞到基斯保羅好唔忿氣，賽後立即追住朗度入更衣室，但被「綠軍」助教及時制止。

讓得起76人6.5分

之後接受訪問時，基斯保羅狂寸朗度：「朗度真係好彩，可以同皮雅斯、雷阿倫同加納特一隊。」其實「CP3」同朗度尋日喺比賽時已經一度喺籃底有推撞發生口角，最後兩人都被判技術犯規。賽後朗度透過發言人表示：「朗度要求大家唔好再問關於基斯保羅嘅事。」塞爾特人今季加埋拉舒華萊士實力提升，聽日作客76人小讓6.5分，冇理由唔捧上盤！