金塊銳不可當！呢支上季西岸決賽球隊，隨住尋日主場大勝灰熊133:123後，開季已經累積3連勝，創出24年嚟最佳開季紀錄，功臣首推射入42分嘅「小甜瓜」安東尼。
金塊近年成績突飛猛進，上季殺入西岸決賽已經叫人眼前一亮，估唔到今季仲keep得住，連埋尋日大勝灰熊，開季已經連贏3場，追平85-86年嘅開季紀錄。
有咁好嘅成績，安東尼絕對係最大功臣，呢位球星繼日前對拓荒者射入41分後，尋日對灰熊又射入42分，加入NBA6年嚟首次連續兩場常規賽射入40分以上，暫時平均得分高達37.6分。
其實灰熊尋日已經打得唔錯，二年生美奧仲射入職業新高40分，唔夠金塊揪全因輸經驗，但據聞「AI」艾佛遜已經傷愈，有機會喺今朝作客帝王時復出。