努力一定會有回報！籃網尋日正式宣布已經同易建聯、布克盧比斯同哥特尼李爾3位主將續約，其中「阿聯」下年人工仲會加到405萬美元（約3,139萬港元）。喺士氣大大提升下，籃網聽日強勢進襲巫師，肯定有一番惡鬥！

易建聯加人工

據美國傳媒報道，籃網今次同3子續約，其實係希望靠佢哋嚟重組球隊。好多人認為籃網續簽「阿聯」，全因為佢身後嘅中國市場，但其實除此之外，仲好睇好佢嘅努力同天賦。據講，「阿聯」今夏進行特訓，而且收到唔錯嘅效果，啱啱喺揭幕戰作客木狼取得17分同12個籃板就係最大證明。至於布克盧比斯同哥特尼李爾，前者一直被睇好係未來超級中鋒，至於後者潛力亦非常優厚，今次續簽3位新星，肯定對籃網帶嚟正面影響，聽日作客巫師受讓7分，下盤值博。

公牛奇招拔「刺」

最後講番尋日啲波，公牛憑戴歷羅斯取得13分、7個籃板同7次助攻，主場以92:85勇挫馬刺，旗開得勝。其實羅斯仔季前一直受傷患困擾，估唔到尋日一復出表現就咁Sharp醒，公牛為防記者洩露羅斯仔嘅傷勢情況，特別喺更衣室用黑布遮住戰術板，認真細心，馬刺今次真係抵輸！

文：雞脾拜仁