騎士、塞爾特人同魔術都被譽為東岸嘅爭標勁旅，「綠軍」同魔術尋日贏波強勢開咧，唯獨漏低騎士，雖然勒邦占士食出「大三元」，但球隊最後作客仍以91:101不敵速龍錄得兩連敗。

塞爾特人球星加納特，尋日喺復出後首次重返主場比賽，上陣26分鐘取得10分、7個籃板同3次封波，帶領球隊主場以92:59大炒山貓，成為聯盟暫時唯一一支兩連勝嘅球隊，更令對手創出NBA自54年引入24秒射波制度以來開鑼戰最低得分紀錄。

占士食大三元難逃連敗

至於尋日首度出師嘅魔術，就憑杜域侯活取得21分同15個籃板嘅「雙雙」成績，加上新加盟嘅卡特射入15分下，主場以120:106輕取76人。賽後卡特大讚一班隊友打得非常好，自己就好似置身天堂一樣，聽日作客籃網小讓3分，值得再追。

如果卡特依家喺天堂，咁勒邦占士就一定喺地獄，皆因「大帝」尋日縱使取得23分、11個籃板同12次助攻，但騎士作客仍以91:101不敵速龍，自04-05年球季後，再次開季兩連敗，聽日作客啱啱贏波嘅木狼有一定隱憂，寧願吼大。