NBA常規賽尋日開鑼，萬眾期待嘅「霸王組合」勁爆登場！「大帝」勒邦占士雖然交出MVP級數嘅表現，奈何「巨無霸」奧尼爾就佗衰家，以致騎士喺主場以89:95不敵塞爾特人，創會40周年大日子錄得輸波收場，唔掃興就假！

呢場東岸大戰戲碼強勁，現場氣氛一流，十足十打總決賽一樣。焦點所在嘅勒邦占士賽前成隻開籠雀咁，邊聽歌邊Rap歌，佢亦都不負眾望，攻入全場最高嘅38分，並且貢獻8次助攻、4次封阻同2次偷波，創出開鑼戰個人最高得分紀錄，可惜依然無補於事。

大帝38分巨無霸10分

皆因佢嘅新拍檔奧尼爾完全冇料到，畀塞爾特人中鋒柏堅斯嘜到冇啖好食，同占士亦冇火花，最終只能攻入10分同搶到10個籃板，表現明顯唔合格。當初騎士教練米克布朗決定簽奧尼爾，就係希望「巨人霸」能夠喺內線屈機，減輕占士嘅負擔，點知家陣變咗「大帝」嘅負累！

反觀作客嘅塞爾特人就虎虎生威，新加盟嘅拉舒華萊士先任後備，由一班舊將落場搏殺，球員默契明顯較佳。「綠軍」三巨頭雷阿倫、加納特同皮雅斯都有雙位數得分，加上控衞朗度亦交出10次助攻，協助塞爾特人終止造訪騎士8連敗嘅頹勢，連續3季喺開鑼戰贏波。賽後「綠軍」教練李華士識英雄重英雄，大讚奧尼爾係有卡士嘅球星，叫球迷畀啲時間佢融入球隊。