韋迪、高比拜仁以至麥基迪等全屬Tim Grover客仔，可以得到一眾NBA球星信任，全因4字──米高佐敦！當年初出道嘅波神的確光芒四射，可惜每逢對住以湯馬士為首嘅活塞，總會受制於對方嘅超硬朗防守，米高佐敦惟有搵嚟當時只有24歲嘅Tim Grover幫手，特訓成肌肉男以求突破活塞難關，之後「神」人合作更長達15年之久！
有波神例子在前，唔少NBA球星都慕名而來同Tim Grover合作，當中最狂熱者必數高比拜仁，因為佢力邀Tim Grover喺上季全程出任其私人教練，負責調整自己體能，高比拜仁可以喺上季帶領湖人奪得總冠軍，Tim Grover絕對有功勞！