本文重點
要靠Tim Grover巧施妙手重上高峰，又點止得T-Mac一個呢？原來巫師控衞阿連拿斯，以及熱火中鋒謝利美奧尼爾今夏亦喺Tim Grover嘅訓練中心苦練，其中阿連拿斯仲對自己狀態相當滿意，甚至豪言：「依家再無人可以阻擋我！」
「依家我無人能阻！」
受傷復出再受傷，已經成為阿連拿斯近年NBA生涯嘅寫照，佢本人亦忍無可忍，決定喺休季期間「投靠」Tim Grover。可惜長期養傷令體形走樣，加上一隻經多次開刀嘅左腳，令Tim Grover大感頭痛：「為咗令左腳恢復正常活動能力，佢每日需要針灸，我仲派出5名工作人員，每日陪佢復健6至7小時。」
隨住左腳狀況愈嚟愈好，阿連拿斯季前亦回復「自信王」本色：「如果無嚟芝加哥，我諗嚟緊季初仲會有95%機會養傷，但依家再無人可以阻擋我！」加埋同樣經Tim Grover妙手回春擺脫膝患、新球季年薪屬NBA第3高嘅謝利美奧尼爾，兩個人可以齊齊交足貨以證身價！