T-Mac聽老婆勸換教練

麥基迪新季將會以年薪2,323萬美元成為NBA最高薪球員，一旦好似上季咁因傷僅上陣35場，球迷又點會放過佢？為求反彈，T-Mac忍痛棄用合作11年嘅韋恩，改用Tim Grover作體能教練！

重現左腳起跳入樽

其實由97年加入NBA開始，T-Mac就未曾試過打完一整季，到上季出場次數更跌至新低35場！經老婆CleRenda Harris力勸之下，T-Mac惟有同高中年代合作嘅體能教練韋恩分手：「起初我係唔想換教練，但太太不斷勸我，加上自己要喺芝加哥做手術，最好選擇以芝加哥為基地嘅Tim Grover。」

雖然雙方只係合作4個多月，但T-Mac似乎無做錯決定，因為喺Tim Grover同佢嘅團隊幫助下，佢終於再次做到左腳起跳入樽嘅動作，要知道T-Mac受膝傷影響自02年後就未曾成功做出此一動作，可見身體質素大有改善！

除咗久違嘅彈跳力，T-Mac坦言現時亦愈來愈有活力：「以前每朝我都唔願起身，仲會諗：『死啦，今日又要訓練？』但依家已經唔會再昏昏沉沉，身體仲感覺年輕好多。」傳聞佢將喺11月復出，話唔定到時有機會再次見到佢飛身入樽！

T-Mac Profile

効力球隊：火箭

上季上陣場數：35

上季平均成績：15.6分/4.4籃球/5助攻

09-10球季年薪（美元）：2,323萬（NBA排第1）

格芬「變色龍」計劃操Fit

NBA向來競爭激烈，正當巨星們默默苦練希望強勢回歸之際，一班新人亦蓄勢待發！其中効力快艇嘅新秀狀元格芬，特別搵嚟前海豹突擊隊體能教練馬特里夏諾幫手，進行代號「變色龍」嘅神秘訓練，務求操到最弗迎接新球季！咁勤力，難怪ESPN都睇好佢成為新人王啦！

反覆衝上50呎沙丘

雖然格芬身高6呎10吋，體重113公斤，天生一副打內線嘅身材，但即將挑戰NBA嘅佢為怕有所不足，喺教練馬特里夏諾幫助下，去到三藩市海邊進行代號「變色龍」嘅訓練！格芬需要喺50分鐘內反覆衝上50呎高嘅沙丘上面，期間仲會加強難度，例如要求佢攬住20磅重嘅健身球，甚至直接將馬特里夏諾成個人拖上沙丘！

連串苦練，無疑大大增強格芬爆發力，但同時令佢苦不堪言：「依家我全身肌肉痛到爆炸，我仲記得上年首次嚟訓練嘅時候，試過半夜醒咗之後諗究竟捱唔捱到落去。」但呢番苦心總算得到回報，因為最近ESPN訪問53位專家，其中43人都一致認為格芬係新球季最佳新人得主，嚟緊大家要實啦！

格芬 Profile

効力球隊：快艇

季前賽上陣場數：7

平均成績：

13.7分/8.1籃板/2.1助攻

09-10球季年薪（美元）：498萬