新一季NBA喺香港時間今個月28號正式爆發！《太陽報》為大家呈獻一連4輯嘅新季前瞻，今日打頭炮係MVP大激鬥。MVP係NBA個人最高榮譽，高比拜仁今季為咗重奪呢個獎項，喺暑假秘密搵「大夢」奧拉祖雲請教低位技術，不過衞冕嘅勒邦占士亦唔執輸，日射700球提高命中率，加埋杜域侯活同韋迪，睇嚟今季常規賽MVP將會有一番惡鬥。

高比拜仁上季帶領湖人重奪NBA總冠軍，但喺常規賽MVP爭奪戰中，卻輸畀騎士嘅勒邦占士，主要因為唔夠「大帝」咁全面，為咗改善呢個問題，「小飛俠」喺上個月特別飛赴侯斯頓，向火箭傳奇中鋒奧拉祖雲請教低位技術，結果高比拜仁喺兩個鐘頭內極速學識「夢幻舞步」。

占士特訓日射700球

喺球員時代打中鋒嘅奧拉祖雲亦坦言，其實佢喺籃底下嘅風格，更適合高比呢類球員：「其實我一直覺得，我嘅腳步更適合一名後衞或者小前鋒。高比真係好敏捷，喺低位佢一定受益最大。」奧拉祖雲仲預言高比今季表現會比上季更加出色：「高比增加咗呢啲腳步移動技術後，大家真係要好好留意佢嚟緊嘅發揮。我好清楚佢嗰種投入、求勝慾望同保持巔峰嘅決心。」

睇住高比特訓，勒邦占士當然唔會偷懶啦！據講占士早喺7月4號已經復操，跟隨前騎士名將簡特進行特訓。占士自從07年邀請簡特出任助理教練後，喺投籃數據上大幅進步。新一季為咗衞冕MVP，占士特別要求安排地獄式訓練，包括每日訓練前90分鐘進行投籃，一個禮拜練6日，有時夜晚仲要加操，投籃訓練主要以12-18英呎嘅中距離跳投為主，一共分6個投籃點，平均分布喺3分線內嘅6個角度，粗略估計每日要射700球，絕對唔講得笑。

魔獸練瑜伽韋迪換鞋

効力魔術嘅中鋒杜域侯活，同樣選擇加操嚟提升爭MVP嘅本錢，每朝5:30就開始操練，晏晝又繼續操，每日有90分鐘喺訓練房，90分鐘喺籃球場，更特別嘅係，「魔獸」仲玩埋瑜伽：「其實我練瑜伽已經好耐，感覺相當唔錯。雖然對我嚟講唔係一件易事，但瑜伽的確令我嘅身體變得柔軟，協調性更好，仲可以令我有更好嘅精神狀態。」

至於熱火嘅「閃電俠」韋迪，則喺暑假勤練防守，並且改穿Jordan Brand籃球鞋，目的就係挑戰MVP寶座。

勒邦占士（騎士）

位置：小前鋒

上季常規賽MVP排名：1

上季常規賽主要平均數據：

28.4分、7.6個籃板、7.2次助攻

杜域侯活（魔術）

位置：中鋒

上季常規賽MVP排名：4

上季常規賽主要平均數據：

20.6分、13.8個籃板、2.9次封阻

高比拜仁（湖人）

位置：得分後衞

上季常規賽MVP排名：2

上季常規賽主要平均數據：

26.8分、5.2個籃板、4.9次助攻