正所謂世事無完美，雖然常規賽MVP係NBA個人最高榮譽，但攞到呢個獎，就幾乎注定同總冠軍無緣。近10屆NBA，只有2位MVP最後可以攞埋總冠軍，想享「齊人之福」？實在難過登天！
要數近年最經典攞到MVP但失去總冠軍嘅場面，應數2008年，當時高比拜仁首奪職業生涯首個MVP，點知喺當屆總決賽卻輸畀塞爾特人；上年勒邦占士以大熱姿態首度榮膺MVP得主，點知喺季後賽東岸決賽就輸畀魔術提早出局。結果對上一個攞MVP兼奪總冠軍嘅球員，已經要追溯至2003年馬刺嘅鄧肯。
其實之所以有以上情況出現，主要因為近年攞MVP嘅球員，好多時喺球隊都扮演住「單天保至尊」嘅角色，但打完82場常規賽後已經冇晒力，而且亦樹大招風，所以去到賽程更緊密嘅季後賽，往往後勁不繼，出現孤掌難鳴，成為球隊出局嘅關鍵。