運動健將向來最受女性歡迎，體壇明星配索女似乎已成為鐵律，美國雜誌《LIFE》最近就評選體壇史上「至索WAG」，雲達華治老婆美絲、柏加老婆伊娃上榜大家都估到，但係連「性感女神」瑪麗蓮夢露、奧斯卡影后荷爾芭莉都入選，大家又諗唔諗到？

美國雜誌《LIFE》今次嘅評選規模龐大，評選嘅WAG（女友及太太）係不分時代、不分項目，就連前妻、前女友都係評選對象，由於大部分WAG都有模特兒、歌星、影星等身份，所以《LIFE》一共選咗32人之多，當中NBA球星另一半佔咗8個成為大戶，効力馬刺嘅法國控衞柏加老婆伊娃大熱入選，傑特、格蘭希爾、謝法臣、查歷等球星嘅眼光亦得到肯定。

影后荷爾芭莉亦入圍

足球喺美國雖然冇咁受歡迎，但仍有5個WAG成功入選，「野獸」卡林保嘅「美女」老婆艾麗安娜一向靚爆鏡，同雲達華治老婆美絲都係理所當然，朗拿度前女友奇卡萊麗同馬基列尼、費高另一半都係超級名模，所以通通獲得垂青，最諷刺嘅係喺美國人氣高企嘅碧咸，明星老婆維多利亞竟然冇份，認真唔畀面。

呢個名單都有唔少令人意外地方，公認係史上最性感女神嘅瑪麗蓮夢露，原來54年同棒球員迪馬喬結過婚，攞過奧斯卡影后嘅荷爾芭莉亦喺92年嫁畀一個棒球明星，所以齊齊「夠資格」上榜囉！