積遜威廉士（J Will），一個只要你睇過佢喺帝王演出都會迷上嘅球星。呢粒「白朱古力」08年因膝傷退休，1年後靜靜雞復出「變」魔術，呢位人生不斷經歷高低潮嘅球星，會為魔術帶嚟高潮定低潮呢？

早於高中成名嘅積遜威廉士為跟從大學教練多諾曼而入讀Marshall大學，之後多諾曼轉教佛羅里達大學，積遜威廉士自然追隨，但由於轉校生第一年唔可以代表學校出賽，所以呢一年J Will就經常坐冷板，亦都喺呢個時候接觸大麻。經多諾曼屢勸無效，J Will兩次藥檢呈陽性反應，多諾曼無奈咁將J Will停賽，直至大學生涯完結，將佢打進人生第一個低潮。

大學停賽 步入低潮

積遜威廉士停賽期間被父親鎖喺屋企，呢段期間佢每日可以做嘅，就係對住四面牆練傳球，一雙熟練嘅手腕就係咁不知不覺練成。J Will漸漸發覺籃球喺佢心中原來佔有好重要地位，如果唔打籃球，人生就玩完。多諾曼得知J Will苦況，雖恨鐵不成鋼，但都鼓勵佢繼續發展自己籃球事業，所以推薦佢參加NBA選秀會。幸好積遜威廉士早已出晒名，所以好順利咁畀帝王選中，開始佢NBA光輝生涯。

加盟帝王初期，狂妄球風為球隊帶來唔錯成績，最緊要係令帝王Fans數量同轉播次數大增，不過只攻不守風格，拖累帝王一直同冠軍無緣。帝王為嘗冠軍滋味，決以積遜威廉士同灰熊交換防守能力更佳嘅碧比。一轉會到灰熊，因教練要積遜威廉士改變自己風格，減少無謂花巧傳送，起初令表現大幅下滑。唔跟自己方法打波，令J Will無所適從。但深知要圓冠軍夢就要改變，結果喺灰熊幾年間，J Will嘅表現被譽為佢職業生涯最出色幾年，可惜後期同教練不和，顯得鬱鬱不得志。

加盟熱火 重獲新生

然而一切直到積遜威廉士被交換至熱火告終。年過三十嘅積遜威廉士意識到呢個可能係佢最後機會，最終萊利教練喺季後賽對他委以重任，23場全部正選之下，積遜威廉士帶領熱火取得成立以來第一個總冠軍。為自己職業生涯寫下完美一頁。

往後打多一年，成就難以突破，亦因腳傷關係，靜靜咁收山。今季忽然靜靜咁復出加盟上季總決賽隊伍魔術。來季想睇佢交出神奇助攻？比較難！將作為魔術第二甚至第三控衞嘅積遜威廉士，會唔會為自己帶來另一高潮，未知；佢多年經驗會唔會為魔術繼上年後再帶來高潮？反而值得期待。