09/08/2009

播放本新聞相關短片

奧尼爾舒米高踩入電視做主持

本文重點

唔使用「巨聲」唱歌,毋須喺「大道」大喊一場,想殺入娛樂圈,原來喺體壇都有捷徑!足壇、籃壇兩大巨星舒米高同奧尼爾,今個月齊齊踏上「體壇星光大舞台」,化身電視節目主持。當中舒米高希望玩邋遢殺出重圍,「大白鯊」奧尼爾就靠名氣玩花臣,務求脫穎而出做「金牌司儀」。

百足咁多爪嘅NBA騎士巨星奧尼爾,平時做乜都鍾意認叻,以前試過做輔警去捉賊,早排又走去返學報讀體育評述員班,不過「大白鯊」最新搞作,就係炮製一個名為《Shaq Vs.》嘅真人騷,向體壇頂尖人物挑戰,噱頭十足。

《Shaq Vs.》喺上月下旬開始拍攝,奧尼爾首集嘅對手,就係美式足球名將,來自匹茲堡鋼人隊嘅四分衞路斯里斯伯格。佢之後嘅挑戰嘉賓名單仲頂癮,包括京奧8金飛魚菲比斯、美國職棒高手普約斯、拳壇傳奇霍亞、網球「黑珍珠」S威廉絲,及女子沙排孖寶泰蘭娜及姬莉華殊等。

想同碧咸鬥射術

為谷收視,奧尼爾一如既往語不驚人誓不休:「呢班名將都係頂尖人物,但我一定會全力打敗佢哋,我諗佢哋最好都係小心啲。」呢位NBA經典中鋒仲話,佢嘅計劃仲包括有挑戰7屆環法單車冠軍岩士唐、同足壇「萬人迷」碧咸鬥射術,真係唔畀佢嚇死,都隨時笑死。

想知奧尼爾嘅主持功力同其他運動項目實力有幾高?就要留意《Shaq Vs.》喺今個月18日嘅首播,之但係個節目暫時未有亞洲版,香港觀眾想睇即管上網諗諗計,或者留意住我哋《太陽體育》嘅報道。奧尼爾Vs細威,諗起都有啲驚喎!

徐浩然