風靡萬千球迷的NBA湖人巨星高比拜仁襲港，三日行程匆匆，但依然抽空接受本報訪問，高比盛讚香港人對籃球充滿熱誠，令他非常喜歡這個城市。已取得四次NBA總冠軍的高比，下個目標希望再度協助球隊湖人取得下屆NBA冠軍。
香港人對籃球有熱誠
Ｑ：點解每次訪亞洲，都會嚟香港？
K：我好鍾意呢度！因為香港人對籃球好有熱誠，每次我嚟到呢度探訪，同班小朋友打波，都會畀佢哋對籃球嘅熱情感染，令我好想返嚟睇吓佢哋進步咗幾多。
想玩倫敦奧運……
Ｑ：你點睇奧尼爾加盟騎士、阿利沙嘅離開同阿堤斯加盟？
K：我哋（湖人）會難啲攞冠軍，我唔知新球員會令隊波有咩變化，要睇吓我哋可以買到啲咩人，會產生啲乜嘢化學作用去贏冠軍，呢個係我最期待嘅。
Ｑ：你對球員轉會有啲咩評價？
K：只係生意嘅一部分，雖然阿利沙同我好老友，但我只認為呢個係一盤生意，我會祝佢前程似錦。
夢幻1 on 1：佐敦、韋斯
Ｑ：你認為自己可唔可以打到2012年倫敦奧運？
K：梗係想，呢個係一個好值得同難忘嘅經驗，如果被選中，我會覺得好榮幸。
Ｑ：勒邦占士話你打算出年再參加明星賽入面嘅入樽賽，你十幾年前曾經贏過呢個比賽，你今次係咪想再試吓？
K：我首先要澄清一下，佢冇咁講過，因為佢係我朋友，所以要幫佢解釋吓。但我相信NBA球迷會好高興見到我哋比併，一定會很精彩。
Ｑ：如果要你揀個効力湖人嘅名宿進行夢幻對決，打場1on1，你會揀邊個？
K：謝利韋斯（Jerry West），因為我哋喺球場上嘅表現幾相似，如果可以同佢玩1 on 1，肯定好有挑戰性。但如果要揀其他籃球員嘅話，我會揀米高佐敦。
Ｑ：你下一個目標係乜？
K：協助球隊做得更好！過往都係為自己，但依家想幫球隊進步，再贏得冠軍。
Ｑ：亞洲球員點先可以去打NBA呢？
K：其實無論任何地方嘅球員都一樣，一定要努力，要贏波，就要適應NBA比賽嘅速度。
Ｑ：記者 K：高比
前晚深夜抵港嘅高比仔，尋日晏晝連「踩」兩場，出席贊助商NIKE安排嘅官方活動，先到尖沙咀旗艦店公布新球鞋面世，然後再殺入灣仔修頓室內運動場，向本地小將傳授籃球絕技！
講到明「教人唔教波」嘅「高比Sir」，雖非首次訪港，但現身球場一刻仍惹來全場Fans尖叫，全場High爆，一如過往，該位NBA超級巨星放低明星架子，親自落場指導香港學界精英，席上挑選了三位資質特佳嘅小將，傳授三大絕招。
下次到訪望同肥宏交手
就讀男拔嘅福建球員劉凱濤，獲高比拜仁教授「小天勾」技術，徐遠成則獲授Fade away，至於周健宏就學左搖右擺過人，其實「肥宏」喺07年已同高比交過手，今次再遇，高比仔仲話下次訪港嗰陣，想同佢玩1on1添！三位小將受教後都表示自己開咗竅，仲話會不斷苦練高比所授嘅技術！
另外，前晚大概12點，高比離開酒店去咗中環蘭桂坊消遣，佢之後就轉去只係招待會員嘅夜店Halo玩，不過都係留咗兩粒幾鐘就走喇。到咗尋晚，高比繼續出動，11點之後去咗銅鑼灣富豪酒店消遣，據聞呢間酒店有一間私人會所。今朝佢就會離港飛去上海，繼續佢嘅亞洲之旅。