事隔兩年，高比仔已經一嘗奧運同NBA總冠軍嘅滋味，有咗冠軍銜頭，個人望落都自信好多，所以尋日無論喺訪問場合、尖沙咀商場定係修頓球場，呢位巨星都係態度一流，仲畀人「成熟咗」嘅感覺添！

即場除鞋送畀Fans

勁識氹Fans嘅高比，出到公開場合大玩「親民」，每當佢接受傳媒訪問嗰陣，都會主動同記者握手，為咗令更多球迷見到佢，高比仔仲特登企高啲，嚟個360度環迴揮手！唔單止「親民」，高比仲過癮到向球迷堆狂掟簽名籃球，搞到現場咿哇鬼叫，令粉絲「驚喜」不斷！

咁都未算，佢喺離開修頓球場之前，就喺看台揀咗三位舉牌女球迷，向佢哋贈送簽名波之餘，仲即場除咗對鞋簽名送畀佢哋，認真盞鬼，冧到呢三位女幸運兒揚言鑲起呢對鞋留念！