嚟到啦！NBA湖人超級巨星高比拜仁尋晚喺台灣旋風式飛抵香港，隨即入住半島酒店，得到現場60位Fans守候歡迎，高比以V字手勢同球迷Say Hello，態度親民，佢今日更會化身「高比Sir」喺修頓指導本地年輕球員，不過當問及退休後會否轉任球會教練，高比就決絕Say No！

完成咗菲律賓、新加坡同台灣站訪問嘅高比，乘坐私人飛機抵埗，原定晚上9:45到達下榻酒店，20多個球迷喺1個鐘頭前開始守候，更有擁躉混入記者區，企圖於更近距離接觸偶像，最後高比喺11:00到酒店，60個現場球迷即時起哄，不過佢用V字手勢同球迷示意後，就行入酒店大堂，未有為Fans簽名同影相。

放大圖片	放大圖片	雖然愛教人打波，但一講到做教練，高比即「耍手擰頭。」

講番今日行程，今次有帶同私人教練嘅高比，上午可能先進行個人體能訓練。至於首個官方公開活動則會係下午3:00到尖沙咀嘅NIKE旗艦店同球迷會面，然後高比喺4:00會殺過灣仔修頓室內場，與本地籃球員交流，以及指導年輕球員籃球技巧。

放大圖片	高比早前訪問新加坡時，將簽名波鞋贈予一名五歲女童，盡顯親民一面。 （美聯社圖片）

發表效忠湖人宣言

事實上高比對今次活動都有好大期望，之前已經話過唔想好似昔日一啲大牌球星，只係喺訓練營稍為露面Hea住教波嘅佢，一早透過公關安排要再同幾年前喺香港得到過佢指點、以周健宏為首嘅本地年輕球員會面，高比仔目的係想檢查佢哋喺呢幾年籃球技巧嘅進度，果然相當認真。

雖然鍾意教導年輕球員，不過高比喺日前新加坡站被問到有冇興趣退休之後帶隊教波，佢就回應：「我可以肯定咁答你——No！」高比同時就自己前途去向再次重申，自己一生只會効力湖人，One Life One Club：「我真係睇唔出自己有効力其他球會嘅可能。」完成今日活動後，高比會喺聽朝7:00離開香港，繼續佢嘅亞洲之旅第5站，進軍上海。