24/07/2009

播放本新聞相關短片

得高比指點進步大

周健宏‧19歲

英華書院籃球隊中鋒

「07年高比嚟香港時曾經同佢打1 on 1,當時佢教我一啲基本功,好似走位同射波技巧,今次有機會再次同高比交手,心情好興奮、好期待,好想話佢知我有跟佢指示練波,呢兩年自己打波都有進步。」

早排爆出騎士「大帝」勒邦占士畀個高中生「兜頭」入樽,事後話占士勒令沒收全場影帶,不過紙又點會包得住火吖?尋日兩個網站先後將當日過程片段曝光,占士今勻當然瘀爆收場啦!

話說喺今個月9號,占士喺阿克倫大學舉行一個名為「勒邦占士技術學院」嘅籃球訓練營,點知喺場練習賽入面,佢竟然畀個矮佢10cm、叫哥羅福嘅口靚仔喺正面前入樽,仲要係占士有出手封阻都唔掂。事後占士雖然派人收起官方拍攝嘅片段,之但係尋日就先後有兩段現場觀眾影嘅片流出,據聞當日有在場嘅球迷已經證實段片係堅貨添。

根據占士好友「閃電俠」韋迪所講,原來高比之前打過電話同佢傾開,都有叫「大帝」睇開啲,算係關心老友啦!講真,今時今日唔少高中生打波都有好身手,好似高比仔日前喺菲律賓站出席活動,就收到消息話當地有個5呎8吋高中生,周三喺場學界賽事個人轟入89分,仲勁過當日高比仔單場入81分紀錄,咁唔通高比又要發爛渣咩?