子繼父業接掌武館，或任教練培育新星，對前南拳世界冠軍鄭家豪來說，都是退役後一條「理所當然」而又最易走的路，不過，這位「碩士拳王」偏偏「捨易取難」，卸下戎裝、改着西裝，投身商界從事社區服務，為的是要實現自己的理想：「令體育運動喺商業社會佔到重要一席。」
出自武林世家的鄭家豪，10多年運動生涯獲獎無數，至05年再奪世界賽金牌後毅然急流勇退，隻身負笈北京，入讀中國社會科學院研究生院，轉做全職學生。苦讀4年，「家豪」終在去年7月畢業，取得文學碩士學位。
縱然學業有成，但他竟曾陷瀕臨精神崩潰的困局：「由細到大，都靠成績同汗水去搵認同感，贏獎牌係做人最大目標，但退役之後，我突然間冇晒Target，前路茫茫，唔知自己存在價值係乜，好痛苦……其實喺北京嗰幾年一直都有呢種感覺。」
走訪少林寺頓悟人生
「畢咗業仲慘，擔心前途囉，我諗過教拳、繼續讀書、留喺北京發展、或者返香港搵嘢做，朋友話我有咁多條路行，好幸運，實際上太多選擇反而係一種折磨，因為我驚揀錯，年紀唔細喇！」因緣際會，「家豪」一次走訪少林寺得到頓悟，明白「一個人唔係靠外來物質嚟自我認同，有豐盛心靈同自信先最重要」。
聯絡地區團體搞慈善
結果，他決定回流香江，並在去年底透過香港奧委會「香港運動員就業及教育計劃」殺入「商場」，受聘於合和實業有限公司，任職社區服務主任。「咪誤會，我唔係做生意人！我嘅工作範圍主要幫公司做社會服務，好似聯絡地區唔同團體，一齊搞公益活動。講真，最初接手做我都一頭霧水，但愈做愈開心，因為我可以將運動元素帶入商業世界。」
盼提升運動員社會地位
「家豪」自言過去7個月的工作經驗和際遇令他得到很大滿足感：「慶幸公司（合和）重視體育，畀到我好大空間去實踐理想。香港係商業社會，只要商界關注體運活動，肯投資、肯贊助，體育推廣事業就大有前景，運動員地位自然提升。」
「阿爸間武館『鳳翔武相』我點都會接手，不過總希望趁後生先出去闖一闖，而且好想為香港體育界做番啲嘢，算係一種回報！」說着、說着，鄭家豪談起手頭上多項活動計劃時，雀躍得兩眼發光。
「豪」情壯語
雖然鄭家豪三十而立才正式找到「第一份工」，不過這個性格開朗兼喜嘗新事物的「乖乖仔」，其實早已踏入「社會大學」，以玩票性質從事過電視台主持工作，近期更「瘋狂地」參與義工事務，即使「日踩3場」亦毫無怨言，皆因他信「人間有情」。
獎項
‧99年世界賽南棍金牌、南拳銅牌
‧01年世界賽南棍、南拳、南刀銀牌
‧02年亞運南拳全能銅牌
‧03年世界賽南拳金牌、南棍銀牌
‧05年世界賽南棍金牌
榮譽
‧04年當選03年度香港傑出運動員
‧05年榮獲民政事務局嘉許獎
（推動康樂體育發展傑出人士）
‧07年獲頒行政長官社區服務獎狀
‧08年擔任北京奧運香港區火炬接力第74棒火炬手
註：只列部分