09/07/2009

播放本新聞相關短片

基斯安達臣大爆髮

人一旦跌低咗,有幾多個可以爬番起身?以阿7所知真係唔多,但至少NBA金塊前鋒基斯安達臣就係其中之一!佢因為藥檢肥佬曾經被停賽2年,所有前途都幾乎無晒,好在佢無放棄自己,復出之後愈打愈好,今季表現指數直情好似佢嘅髮型一樣,愈Gel愈高,真正係大爆「髮」!

04年加盟黃蜂後,基斯安達臣同球會簽咗為期4年總值1,400萬美元嘅合約,本來大把「錢」途喺手,無奈佢喺06年因為藥檢肥佬被罰停賽2年,之前簽落嘅高價合約亦變成廢紙!好在落難之際,基斯安達臣仍然得到律師好友麥克拜仁相助,佢唔單止招呼基斯安達臣到自己屋企居往,仲安排對方接受戒毒療程,至於基斯安達臣亦喺2年停賽期間繼續練波,並未放棄重返NBA!

藥檢肥佬戒毒重返NBA

經過2年停賽期後,基斯安達臣終於重返NBA再次投身黃蜂,之後喺08至09球季以自由身加盟金塊。洗心革面嘅佢喺場上拚盡全力,憑住出色嘅封阻同籃板能力,迅即成為金塊球迷寵兒:「如果唔係停賽咁長時間,我都未必可以重新改過,亦唔會有今日嘅我。」

雖然態度行為上改過自新,但基斯安達臣形象上就有愈嚟愈激嘅傾向,除咗紋身超多之外,佢嘅NBA生涯試過以唔同髮型示人,可惜由初出道嘅陸軍裝、傻仔頭到効力黃蜂時期嘅中間分界,全部都畀人難頂感覺!直到上季効力金塊改以Gel到超硬嘅刺蝟頭示人,總算贏回「幾型吖」嘅評語,唔知新一季NBA佢會繼續刺蝟頭,還是又有新變「髮」?

基斯安達臣

出生日期:1978年7月7日

出生地點:加州

身高:208cm

體重:103kg

効力球會:金塊

曾効力NBA球會:黃蜂

極秘自白書

‧基斯安達臣紋身多多,其中左右臂分別紋上漢字「好」同「惡」,意思原來極具哲學味道:「咁樣代表我存在喺好壞兩面之間,其實唔止我,大家都一樣。」

‧雖然外表兇神惡煞,不過基斯安達臣讀書年代曾經修習樂器色士風同小號,認真人不可以貌相!

‧本身有一要好女友Brandy Newman,女方現時係房地產經紀,但原來以前熱衷健身運動,甚至喺公開比賽展示自己一身肌肉,可見基斯安達臣審美觀認真獨特!

每周金句

「新特蘭想買查馬克(右圖)?查馬克話過離隊係去頂級球會,佢去新特蘭做咩?我連新特蘭上季排第幾都唔知!」

金句指數:★★★★

阿7