會考肥佬，錯過進入大學之路難免令人徬徨，但換個角度睇話唔定係1次轉機？美國高中籃球員班頓真寧斯（Brandon Jennings）就係最佳人辦，當日大學入學試肥佬嘅佢，毅然放棄進軍NCAA轉打意大利聯賽，從而贏得過百萬身家！今年佢仲會加盟公鹿，大家睇NBA記住留意呢位百萬「籃」生！

認識班頓真寧斯，首先由佢就讀嘅Oak Hill Academy開始，呢間高中培養出無數籃球明星例如金塊前鋒安東尼及雷霆後衞杜蘭特等籃球明星，司職控球後衞嘅班頓真寧斯中途轉校至Oak Hill Academy，隨即喺07至08球季打出平均每場32.7分、7.5次助攻及5.1個籃板球嘅驚人成績，同年更加獲頒Naismith最佳高中籃球員、Parade雜誌最佳球員，以及EA Sports最佳高中球員3大獎項，充分奠定最強籃球高中生地位！

外流意大利打開「錢」途

本來按NBA球星成名路徑，班頓真寧斯理應進入有名大學挑戰NCAA聯賽，然後再挾超級新人之名加盟NBA球隊。可惜事與願違，班頓真寧斯兩次大學入學試都失敗告終，令佢未能進入心儀嘅亞里桑那大學，惟有把心一橫加盟意大利球會Lottomatica Roma，提早成為職業球員：「我本來諗住上大學，然後轉戰NBA，真係無諗過會飄洋過海到歐洲打波。」

但今次班頓真寧斯嘅決定，反而為佢打通「錢」途，因為單單同球會簽約3年，已經令佢得到165萬美元收入。然後再同銳意進軍籃球市場嘅運動用品生產商Under Armour簽下4年價值200萬美元贊助合約，班頓真寧斯搖身一變成百萬富翁，收入遠遠超過1個大學生！

除咗落入袋中嘅花碌碌鈔票之外，外流打波其實亦為班頓真寧斯帶嚟意外收穫，因為整整1年喺意大利嘅生活令佢心智成熟起嚟：「唔單止球場上嘅挑戰，平日生活經歷嘅起起跌跌都給予我唔少磨練機會。」經已大個仔嘅班頓真寧斯，今年以首輪第10位新秀身份加盟NBA球隊公鹿，大家不妨喺新球季好好認識佢！

「真」檔案 Brandon Jennings

出生日期：1989年9月23日

出生地點：加州

身高：185cm

體重：77kg

効力球會：公鹿

曾効力球會：Lottomatica Roma

位置：控球後衞

外號：Young Money、Mr. Excitement、Takeover

家庭狀況：母親Alice Knox、弟弟Terrence Phillips

偶像：艾佛遜