唉！職業球員生活真係唔易捱，單係操練密度已經唔係高中可以比較，依家喺意大利朝早就要喺Gym房練體能，中間抖幾個鐘又要再練戰術。最慘係教練Jasmin Repesa又認真到爆，我都只不過喺練波期間拖慢少少回吓氣啫，佢就當住咁多隊友面前大喝要我認真啲，之後仲趕咗我出體育館唔准我練波！我以前打高中嗰陣，邊會有人阻頭阻勢？第2日教練仲逼我向全隊人道歉！但無計啦，依家球會畀錢你打波，教練要點做就點做啦！

鍾意名牌……捨得買

如果遇着唔使比賽同練習嘅日子，我多數都會隨街逛吓，但講出嚟都唔係幾好意思，其實我好鍾意名牌，所以每次行街都會去名店好似Prada同Versace「巡吓舖」咁啦！以前我會捉埋隊友Allan Ray去，但自從媽媽Alice Knox嚟到意大利之後，我就會同佢老人家行啦。好似今次我去Gucci睇嘢，其實我先前已經喺嗰度買咗皮帶、銀包同背囊，貢獻咗唔少血汗錢。但之後睇中一對靚鞋，差唔多要350歐元，如果以前喺美國根本諗都唔敢諗，但依家搵到錢，一於獎勵吓自己啦！

老竇早逝……印象模糊

爸爸Byron對我嚟講，印象好模糊，因為佢喺我3歲已離開咗家庭，到我7歲嘅時候佢亦自殺離世，所以我好重視僅有嘅家人阿媽Alice Knox同細佬Terrence Phillips，難得球會好體諒，安排佢兩個嚟到意大利陪我，唔止租咗一間有3房嘅大屋畀我哋住，仲提供埋私家車等媽媽送我出入，至於細佬讀緊嘅國際學校亦係由球會支付每年24,000美元學費！依家返到屋企見到細佬，食到媽媽煮嘅飯，諗番以前全家都只係靠媽媽喺學校打工嘅15美元時薪支撐，1日3餐都喺快餐店搞掂嘅日子，真係覺得世界已經唔同晒。