早前一度聲稱腳傷加劇，下季提早收咧嘅火箭球星姚明，據講經過同火箭軍醫、醫學專家商議後，決定接受手術，如果康復進展良好，有機會喺下季中復出。

活塞傾掂哥頓維蘭紐華

姚明日前返休斯敦覆診，結果發現左腳骨裂未有埋口之餘，反而有加深情況，火箭軍醫一度警告姚明下季都唔可以上陣，甚至唔可以再打NBA。為咗挽救自己嘅職業生涯，姚明親身去華盛頓尋訪名醫，最終得到意見後，決定接受手術，姚明話：「我依家要做嘅就係盡量保持樂觀積極嘅心態，我要一直等待，等待希望。」

另外，隨住NBA轉會市場重開，各隊開始進行交易為下季鋪路，當中以活塞最積極，據報已經同公牛嘅哥頓同公鹿嘅維蘭紐華傾妥個人條件，日內就會簽入呢兩名自由身球員。同時，快艇亦已同意用蘭度夫，交換啱啱由紐約人加盟灰熊嘅昆田李察臣。另有消息指，拓荒者教練麥美倫同陶告魯食晚飯，睇嚟呢位魔術球星轉會好事近。