外號「禪師」嘅湖人教練積遜，向來畀人言行高深莫測嘅感覺，就以湖人早前贏得NBA總冠軍為例，積遜帶住嗰頂喼帽上面嘅「X」其實係羅馬數字10嘅意思，象徵住佢以教練身份10奪NBA總冠軍偉業！試問普通人又點估到？但更估唔到嘅係積遜後生時候原來滿面鬍鬚亂髮，以一副嬉皮士Look橫行球場！

其實湖人贏得NBA總冠軍當日，積遜頭上嗰頂喼帽係由經理人穆桑博格父子共同製作，當中黃同紫色正係湖人主色，上面嘅「X」象徵住積遜10奪NBA總冠軍功績。

生產「X」喼帽收入捐大學

喼帽亮相後隨即引嚟無數人打聽邊度有得買，經積遜同穆桑博格父子商量後，決定生產喼帽以25美元出售，所有收入會捐畀積遜支持嘅美國印第安大學基金會，作為該間大學學生的獎學金！

積遜戴上喼帽，除咗象徵自己功績之外，其實亦要遮掩一下日漸稀疏嘅白髮！咁又唔怪得佢嘅，因為積遜經已63歲，年紀實在唔細，再睇番佢近期剃去所有鬍鬚，莫非想留住青春，抗拒變老翁？

諷刺嘅係，積遜今日剃鬚回復青靚白淨，原來60年代以球員身份打滾NBA嘅佢反而不修邊幅！生到落腮嘅鬍鬚再配上凌亂頭髮，如果除咗波衫換上喇叭褲花花恤衫，根本同當年流行嘅嬉皮士Look無分別，但諗真積遜本身喜好禪學，愛思考嘅佢即使當上嬉皮士又有幾奇？