隨住湖人一搔七年之癢，重奪總冠軍，兼結束勝利巡遊，08-09年度嘅NBA球季亦正式告一段落，當中無數片段至今仍然印象難忘，日前美國著名網站ESPN就選出今季NBA威水一族同悲哀一族，同大家回味今個球季嘅樂與怒、喜與悲！

有名有利，有個靚老婆仲有兩個得意囡囡再加萬民景仰，4奪NBA總冠軍嘅高比拜仁絕對係依家全NBA最幸福嘅男人。等咗7年再闖高峰，最特別嘅係，呢次唔會好似前3次咁有個叫奧尼爾嘅人搶佢風頭。今次，佢打造屬於自己嘅總冠軍，吐氣揚眉、獨領風騷！

一嘗所願奪決賽MVP

高比拜仁喺NBA打滾咁多年，乜都贏過晒，獨欠一座總決賽MVP。結果高比今季憑總決賽平均取得32.4分、7.4個助攻同5.6個籃板，帶嚟個人第4個總冠軍外，亦一嘗所願拎埋總決賽MVP。決賽頒獎當日，高比嘅靚老婆帶埋兩個囡囡出嚟同佢慶祝，真係事業家庭兩得意。

湖人粒粒皆星，要做到服眾唔容易，但高比仔就用表現令其他隊友心悅誠服。好似隊友奧當就話：「高比好有感染力，有佢喺度特別醒神。」加素就咁講：「單打獨鬥佢唔驚，但佢知道乜嘢係Teamwork，帶領球隊贏波。」就嚟約滿嘅佢亦得到湖人開出5年、價值1.3億美元（約10億1,400萬港元）嘅合約。依家乜都有，高比仲邊有人夠你幸福呀！

喜

最神奇‧積遜

高比拜仁成功擺脫奧尼爾陰影重奪NBA總冠軍，固然值得開心，但大家更應該替教練積遜慶祝，事關佢老人家已經第4次幫湖人攞冠軍，加埋之前公牛嘅6次，已經第10次以教練身份攞總冠軍，超越「紅衣教主」奧爾巴治，成為NBA史上第一個十隻手指都有冠軍指環嘅教練，最恐怖仲要喺短短18年執教生涯入面完成，除咗神奇之外，睇怕都冇其他字更適合形容佢嘅豐功偉績。

最有前途‧朗度

好多人覺得朗度近年之所以有好表現，全因為有加納特、皮雅斯同雷阿倫傍住，不過隨住加納特今季長期受傷，大家先至發現原來朗度嘅實力都拍得住「三巨頭」，今季喺常規賽除咗封波之外，其餘項目全部刷新個人新高，到咗季後賽，平均每場更加攞到18.3分、9.6個籃板、9.8次助攻同2.7次偷波嘅驚人數據，假以時日，相信朗度必定會成為NBA一線Point Guard！

最爭氣‧比立斯

仲記得活塞季初將比立斯交換金塊嘅艾佛遜，好多人都以為比立斯從此就會同季後賽絕緣，點之比立斯大打爭氣波，利用自己嘅經驗，將金塊由一隊平平無奇嘅球隊變為爭標分子，仲激發起安東尼、簡安馬田同JR史密夫嘅小宇宙，最後帶領金塊以西岸第2殺入季後賽都未算，仲要連續橫掃黃蜂同小牛出局，繼1985年後再入西岸決賽，成為家鄉英雄，試問季初邊個會諗到？

最出位‧奧尼爾

雖然職業生涯首次缺席playoffs，不過奧尼爾仍然係大紅人，幾乎日日都同其他球星扯上關係，先傳佢下年會加盟騎士同占士並肩作戰，之後又不停讚高比拜仁終於脫離佢嘅陰影重奪總冠軍。雖然太陽今季冇得打季後賽，但奧尼爾喺常規賽仍然交足功課，加埋喺明星賽跳舞，最後同高比雙雙成為MVP，今季最出位嘅球員，唔揀奧尼爾仲可以揀邊個？

悲

最黑仔‧米克布朗

宿命難違，近年攞親年度最佳教練獎嘅「幸運兒」都冇好下場，Avery Johnson同Sam Mitchell係表表者，今季就輪到騎士教練米克布朗中咗降頭。布朗今季帶領騎士攞到66勝，創下球會史上最佳成績，榮膺年度最佳教頭可謂實至名歸。不過身為爭標熱門連總決賽都入唔到，睇怕有得揀嘅話，米克布朗情願常規賽輸多兩場都唔願攞呢個年度教練獎囉！

最失望‧莫威廉士

莫威廉士係騎士第2得分點，若然「大帝」死火真係要睇佢頭，難怪連勒邦占士都讚到莫威廉士天上有地下無，話呢位控衞係最被低估嘅球員，又指佢嘅質素喺NBA嚟講算係頂級，卒之去到季後賽就見真章。東岸決賽頭4場波，莫威廉士射咗27球3分全部炒晒，對住魔術嘅6場波只得37%命中率，騎士出局真係多得佢唔少，莫威廉士被低估係正常㗎！

最嘥料‧新奧爾良黃蜂

黃蜂上季嘅表現贏盡口碑，今季自然被寄予厚望，弊在會方搞死隊波，季初諗住將明星中鋒贊特拿拎去交易，最後掟唔走贊特拿，反而令陣營士氣低落。最無辜係基斯保羅，就算打到曉飛都冇用，皆因班兄弟嘅狀態時好時壞，同爵士嘅迪朗威廉士一樣有孤掌難鳴之感，一班咁有潛質嘅波因為種種因素打唔出水準，絕對係嘥料！

最無奈‧史端

史端喺1984年成為NBA總裁，多得「波神」佐敦、「小鳥」布特同「魔術手」莊遜幾位經典球星嘅出現，將NBA推上高峰，亦為聯盟吸納更多Fans同豐厚利潤。近年史端不斷將NBA拓展至其他國家，等世界各地嘅球迷都有得睇NBA賽事，所以史端最緊張嘅就係收視。可惜騎士今季無緣總決賽，打造唔到火併湖人嘅「夢幻對決」，令總決賽嘅收視率比去季跌咗10%。