02年後首位衞冕球手退賽

為備戰溫網，拿度近日不斷加緊治療傷患，無奈康復進展並不樂觀，日前在表演賽鬥希域時無論奔跑速度、抽擊力度都比當弗時遜色，無壓力錯誤亦極多，輸波可謂相當正路。心情極差的拿度賽後亦拒絕接受訪問，乸口乸面返入更衣室。

及後教練東尼為愛徒解畫：「佢連屈膝都有困難，如果係我就唔會參加溫網，直接飛返馬略卡！」據悉，拿度打完稍後舉行的一場練習賽後，就會決定會否衞冕溫網。若拿度扯白旗，將會係02年伊雲尼斯域後首位未能參賽的衞冕球手。

就算拿度能夠神奇康復，無奈經大會抽籤過後，「野獸」與大勇的英國天才球手梅萊落入同區，次圈亦有可能再遇希域，衞冕之路肯定艱巨。費達拿則有機會於4強硬撼祖高域。女單方面，大、細威分列上、下區，暫時毋須「互相殘殺」，與大威同區尚有剛奪法網亞軍的「一姐」沙芬娜，舒拉寶娃則與細威身處同區。