全季打得35場

麥基迪能傳擅射，入樽爆籃瓣瓣掂，球迷當然期望「姚麥配」會有一番作為，可惜T-Mac今季傷多過打，仲要打一場抖一場，全季加埋打得嗰35場波，完全唔配咁大份糧。更離譜係T-Mac季中靜靜雞決定做手術提早收咧，懶理球隊死活，咁鬼冇義氣難怪火箭球迷憎到佢入骨，視麥基迪為過街老鼠！

火箭今季傷兵問題嚴重，尤以內線為甚，先係莫湯保然後再到姚明，偏偏球隊幾個「大茄」布魯克斯、史高拉同柏堤亞又孭得起隊波，仲喺西岸4強逼到湖人打足7場添，即使最尾過唔到關都有晒交代。T-Mac嘅職業生涯從未衝過首圈季後賽，偏偏球隊就憑住「平民」陣容殺入第2圈，足證T-Mac可有可無，再冇地位可言。今季最呃錢係佢、最乞人憎又係佢、最孱又係佢，T-Mac絕對係「屎上最強」！