湖人歷史性第15次封王本應開開心心，之但係喺今日舉行嘅勝利巡遊，就幾乎因為資金不足搞到一鑊粥，好彩喺最後關頭得到一眾有心人出錢打救，資助近100萬美元（約775萬港元），再加埋湖人自資出番一半，今日先可以同洛杉磯市民分享喜悅咋。

睇見球會冠軍巡遊以為好過癮，實質講緊嘅係一個天文數字使費。湖人今次嘅巡遊計劃係喺當地時間周三朝早11點由主場館史特普斯中心出發，之後坐住架開篷巴士巡遊5公里，最後去到洛杉磯紀念館做終點。當中包括場館租用費、維持秩序嘅警力使費同清潔工人使費，竟然係高達200萬美元（約1,550萬港元）之多。

高比「波神」薪價續約6年

雖然話湖人承諾畀一半，但餘下原本由政府畀嗰一半，就因經濟差遭到唔少市民反對，甚至要求取消，好彩最後一刻得到當地電影業商人卡斯韋沙文，同史特普斯中心嘅擁有機構等拍心口包埋另一半先可以成事。

另外，有關湖人班底去向，當然係另一備受關注話題，有消息指高比拜仁將以媲美「波神」佐敦嘅六年高薪合約留效，為新一代湖人王朝打下基石。